Lord Kopet Van EtanKali

A: Pak pemilu ki kapan tho?

P: Sasi Ngarep le

A: Aku Nyoblos opo yo pak?

P: Yo nyoblos Ka’bah no le! P3!

A: Opo kui pak P3? Wong Partaine akeh banget saiki

P: P3 kui Partai Persatuan Pembangun

A: Persatuan pembangunan kok gambare ka’bah yo pak? Ra nyambung. Aku milih P8 wae lah.

P: Opo kui P8?

A: Putra Putrinipun Pak Petruk Padu Perkoro Pohong Puteh

P: Nek ngono aku nyoblos S8

A: Opo kui pak?

P: Silitipun Sapi Saget Singsot Suat Suit Sae Sanget

A: Kowe nyoblos silit sapi pak?

Nyoblos opo ki penake? Kowe nyoblos partai opo? Ngelu!

Ing sak wijine dalu.

Pak Kuntul, 40-an tahun, direktur wonten PT. Mengsle Komunikatiyon, tiyange kalem, blegedu. Daleme Pak Kuntul tebih sanget saking kantorpun. Kulo mboten ngertos kok Pak Kuntul sakniki sregep lemburan. Mbok menawi nembe katah damelan ingkang kudu digarap.

Nah Pak Kuntul niki gadah garwo, asmanipun Bu Blekok, Bu Blekok niki ingkang kulo krungu-krungu tiyange galak, posesif, radi lunyu pituturipun lan sok-sok nyathek. Pokoke ngeri laah.

Sampun ngertos mekaten kok Pak Kuntul niku nggeh sok njarak. Kados dalu niki Pak Kuntul wangsul saking kantor jam 1 dalu. Nggeh cotho tho? Garwone wonten dhalem ngethosi suwi sanget lan mikir sing ora-ora, wedi nek ono “opo-opo” neng dalan.

Kinten-kinten jam 2 dalu, Bu Blekok nge-bel wonten kantor. Gandeng kulo dalu niki angsal piket saking kantor (Eh kulo sanes satpam leh, kulo OB – Office Boss) dadose teng kantor muk wonten kulo kaliyan rencang kulo, asmone Mas Blekak.

Awalipun kulo nggeh kaget kok wonten sing bel jam semonten, kinten-kinten sinten nggeh? Kulo wedi nek ingkang nge-bel niku gundul pringis. Pesawat tilpun diangkat Mas Blekak.

Bu Blekok (BB), Mas Blekak (MB)

Bu Blekok (BB), Mas Blekak (MB)

MB: Haloo..wonten mriku sinten? Wonten mriki sinten?

BB: Sopo ki? ( caturane rodo njengat)

MB: Madosi sinten nggeh?

BB: Kuntul, Pak Kuntul ono?

MB: Pak Kuntul mboten enten, sampun wangsul bune

BB: Oh yo wis

—tilpun ditutup

Mas Blekak dados heran tilpun kok aneh, mboten nyebut saking pundi, mboten nyebut asmanipun. Asline Mas Blekak nggeh ngertos sinten niku ingkang tilpun.

Kinten-kinten 5 menit sak utawis bel ingkang pertama, wonten tilpun maleh. Nggeh tesih Bu Blekok.

BB: Pak Kuntul opo owes mulih tenan?

MB: Wah nggeh mboten ngertos

BB: Mbok digoleki nang ruange disik

MB: Ruange sampun petheng niku bu *padahal males ngecek*

BB: Deloken nang parkiran mobil ijek ora?

MB: Sekedap nggeh bu *tilpun muk didelehke nang mejo, etok-etok niliki, padahal ora*

MB: Mboten enten niku bu, sak ngertos kulo Pak Kuntul sampun manthuk wit-wit ndek wau

BB: Kok durung tekan omah yo?

MB: (mbathin trus kelingan *wooo iyo ndek wau pak kuntul manthuk kaliyan tiyeng estri*)

BB: Opo turu nang Tol yo mas?

BB: Eh iki sopo tho? *laaah lagi takon*

MB: Blekak bu!

BB: Mas Blekak, kui nang ruangane wes ra ono tenan? Kendaraane yo wes ra ono yo?

MB: Mboten bu sak estu, sampun kulo padosi wonten ngandap mejo nggeh mboten wonten. Teng Kolah nggeh mboten enten. Wonten pos satpam nggeh mboten enten.

BB: Ah yo wes *nadane gelo*

—tilpun ditutup

Wah mesake Bu Blekok, njur kulo sms Pak Kuntul, ngabarke nek garwone madosi wonten tilpun ping kalih. Lah kok dibales “ aku keturon nang tol mas, ngantuk..ngapunten ngerepoti “

Weladalah Pak Kuntul…Pak Kuntul ditelepon garwone kok mboten diangkat nek disms kok malah mbalesi. Ah aku emoh mikir sing aneh-aneh. Mugi-mugi Pak Kuntul leres tilem wonten Tol lan  mboten nakal. Sak niki sampun jam 3 injing. Kulo tilem riyen, nguantuk. Ngantuke kados digandhuli king kong. Nggeh sampun.

Mugi-mugi Pak Kuntul mboten Blekak Blekok sak umpani ditangleti garwone, tilem teng pundi? tilem kaliyan sinten? ngorok nopo mboten?. Mugi-mugi Bu Blekok mboten nyathek.

Eh wonten nopo kok Bu Blekok sok nyathek? to be continued

SMA ku nang honggowongso kono, cedak sar kembang. Jaman-jaman SMA kui jaman suwung kanggo ku. Gawean ku kui padu nek ora ngepruki uwong telung dino wae rasane ati ono sing ngganjel. Jaman SMA nek ono jam ke nol (mlebu jam 6 isuk) aku mesti sarapan nang warunge mbok mo mergone kantin nang sekolah durung buka tur ora iso udud nek bar mangan.

Nang warunge mbok mu kui favoritku jangan tumpang karo teh kentel panas. Nang warung mbok mo iki kerep dadi tongkrongane cah mbeling, bandar gelek nang sekolah ku nek transaksi nang kono.

Aku seneng banget karo mbok mo, amargonang warung iki aku iso ngutang. Gari ngomong ” sesssuk yo mbook ” banjur mbok mo nulis nang buku cilik dinggo nyatet utangku. Mbok mo yo seneng diutangi wong aku ki mangane akeh banget. Biasane aku mbayare seminggu pisan.

Neng tau aku mangan akeh nang kono trus lali mbayar, trus sesuk ngono meneh, trus minggu ngarep yo ngono meneh, eh kok sasi ngarepe aku ngono meneh. Utangku numpuk akeh banget neng aku ra gagasan nek aku nduwe utang akeh.

Sir ku sih nek  aku nduwe duit mengko langsung tak tomprangi kabeh, gandeng wancine EHB catur wulan aku yo sibuk sinau lan EHB. Njur wancine tompo rapor, aku wes deg-degan aku wedi nek biji ku elek trus sibu ku nesu. Nek wanci tompo raport ki biasane bocah-bocah tetep mlebu ndampingi wong tuwane.

Eh ladah pas sibu ku teko nang sekolah trus mlebu kelas ku, jubule raportku ora iso dijikuk. Mergone Mbok Mo laporan nang sekolah sopo wae sing nduwe utang nang Mbok Mo, sing ijek nduwe utang ora iso njikuk raport. Utangku SATUS EWU. Sibu ku banjur dadi ngamuk nang aku, aku dijewer nang ngarep wali kelasku. Aku isin byiaaanget.

Saiki mbok Mo wes sepuh banget, terakhir aku dolan rono tak tukoke sweater. Mbok Mo seneng banget, kok yo ijek kelingan karo aku.

Toko Barata

Malem setu, aku dijak bapak mrana amarga aku munggah kelas 5 SD. Klambi seragamku wis keciliken, dadine meh ditukokne klambi seragam anyar. Aku seneng banget. Aku seneng banget ambune kain utawa klambi anyar. Ambune semriwing-semriwing piye ngono. Nek kancaku omong, ambune koyo ambu cino. Mbuh apa hubungane anyar karo cino.

Heh brewok kui Toko Barata nang sar pon sing nduwe budhe ku. Kowe ngerti rak, jaman mbiyen cilik kui budhe nganyelke banget. Nek pas bakdan wancine kumpul kabeh sak sedulur budhe, pakdhe, bulik lan paklik biasane ngewehi duit sepuluh ewuan. Lah kok budhe siji kui sing nduwe toko barata malah ngewehi baret pramuka, dug pramuka. Aku anyel banget jaman mbiyen, mbok nek ngewehi cah cilik ki yo duit wae. Kan iso nggo tuku mblangreng. Yo tho?

Éndang Édan, kui wong édan nang kampungku. Éndang jaré sibu ku umuré podo mbakku sing nomer loro. Jaman cilikané, si éndang kui durung édan, lah dadi édan amargo mboké mati kelindes sepur nang purwosari.Saben isuk éndang gaweane nyapu dalanan sak ndeso, nek uwes éndang udud nang pos rondo. Rambuté dowo ora karuan, klambiné nganggo hem sing wis ora mbejaji.

Aku kerep ngècé éndang nek ameh mangkat sekolah. Nek éndang pas ora gagasan yo ora diapa-apaké neng nek pas éndang lagi nesu biasane aku dioyak karo garo nggowo boto.Lah saiki aku wes gede kok éndang yo ijek kleleran nang dalan kampungku. Sing marai aku kèlingan terus karo éndang kui mergone si éndang ki pinteré ora jamak. Éndang tau muni ngene nang cah-cah cilik nang kampungku.

Kuthuk kui chicken lé

Omah kui house

Jubulé éndang tau ketompo nang jurusan hubungan internasional UGM, banjur kepinteren trus mboké mati kelindes sepur. Éndang dadi stress dibacutké édan. Karapané Éndang Édan.